Thursday, June 8, 2017

අසනු මැන දෙවිඳුනේ



ගියෙමි පුදනට කතරගම අධිපතිව වැඩ සිටිනා නිමල්
දෙවිඳු පුවතර බැබලවූ කඳ සුරිඳු පිදුමට පා කමල්
බැති බරින් පුද පඬුරු ගෙන එයි සරසවා නෙක නෙක විසල්
හදවතේ සැම තැන රැඳේවී ලබා ගැනුමට ඉසුරු මල්
.
පේවි පේවි සෙනඟ පිරුනා පෝලිමකි දේවාලයේ
ගෑවී ගෑවී පොර බදන්නේ පෙරට යන්නයි පේලියේ
දේවි දේවි මහරු ඔවදන් සිතට ගෙන ගිණි දේශයේ
නෑවි නෑවී මතුව ආවේ පමණි තන්හා ලෝබයේ
.
රන් රිදී සළු වලින් සැරසුව දේව මංඩලයේ ලඟ
මවක් හදවත කියා පෑවා  කඳුළු රඳවා නුවනඟ
නැතිළු අබරන ඇගේ දියණිය සරසවන්නට සියො ලඟ
කන්නලව්වකි  අතරමගටම තිබුන ඉසුරත් ගිය වග
.
සුවඳ විහිදන මියුරු රස ඵල පලන් ගානක සරසවයි
වඩා වැඩියෙන් දේව බැල්මට මොනර කොල පසෙකින් තබයි
යදින සිඟමන් මාවතේ හිඳ මුහුනු සිහියටවත් නොයෙයි
රුපියලක්වත් නොමැති වුන් ලෙස උන් අසල පය පටැල වෙයි
.
නොමිනිසුන්ගෙ රුදුරු හදවත තුලින් නැගෙනා ගින්දර
මකා දමමින් කෙලෙස කරමිද දෙවියනේ සිත් පිං බර
නැමැද ආවත් ඔබේ පා යුග පෙන්නලා පුහු බැති බර
අයැද ඔබගෙන් රුදුරු සිතුවිලි කරාවී ඔබවත් මැර
.
විකුම් පානා ලෝක පූජිත නාමයෙන් ඔබ ඒ දිනේ
තමන් වෙනුවෙන් දිවි ගෙවන වුන් සිටී සිතුනි ද දෙවියනේ
පුදන්නට ඔබ මා ගෙනා මල් බාර ගනු මැන සතොසිනේ
දුකින් පෙලෙනා සියළු දන වෙත වෙන්න පිහිටක් සුරිඳුනේ!!!.

Thursday, June 1, 2017

මංගලම් සුබ මංගලම්!!!

සිනාවෙදි ඇති තරම් හිනා වුනු.
කඳුලෙදි කඳුලත් හිනාවක් කරපු...
ජීවිතේ වැටුන තැන් වලදි ලඟින් හිටපු...
පාසලේදි ඇති වෙන්න දඟ වැඩ කරපු...
සරසවියෙදි එකතු වෙලා පිස්සු වැඩ කරපු..
යෙහෙලියේ...
අහසෙන් ඇවිත්
කලා ලෝකයක් මවපු...
කසුන් අයියටත් ඔයාටත් සුබම සුබ මංගලම් වේවා!!!

රන්රසින් මල් මඟට පිවිසෙන යුවතිපති හට ජයමවේවා!!!
දෙව් වරින් බැඳි දෙසිත් සැමදා මල් වැසින් නැහැවී තෙමේවා!!!
සෞසිරින් ලැබ සියළු සම්පත් සිත් තුටින් සැම කල් රැඳේවා!!!
ඉක්මනින් තුන්පත් රැලක් වී ඉස්තරන් දිවියක් ලැබේවා!!!

Thursday, May 25, 2017

කාලිදාසයාණනී



උදෑසන සිටම මන්දාරම් වූ අහස දෙස ඇය ඕනෑකමින් බලා උන්නාය. කාලිදාසයන් අතින් මේඝදූතය ලියැ වුනු
තැන් සිට ඈ අහස දෙසත් වැහි වළාකුලු දෙසත් මහත් ඕනෑකමින් බලා හුන්නේ සිය පෙම්වතා තමන් වෙනුවෙන්
රජමාලිගාව දෙසින් සෙනෙහස කැටි වුනු ඔහුගේ වේදනාව මුසු වුනු, ඇය පිලිබඳව නොවෙනස්ව සිත්හි පවතින්නා
වූ ප්‍රේම හැඟුම් පිලිබඳ තවත් කිසිවක් ඇය වෙත දූතයෙකු අත්හි එවාවිද යන පැතුමිනි.

.
කාලිදාසයානන් යක්ෂයෙකු වේනම් ඒ යක්ෂයාට ප්‍රේම කරන්නා වූ යකින්නිය ඇයමය. යක් කුවේරයා නම්
රජ්ජුරුවන් වහන්සේමය. රජු වෙනුවෙන් කල යුතු සේවයන් මඟ හැර ඇය සමඟ ආලයෙන් බැඳී තමන්ගේම
ලෝකයක ප්‍රේම මාලිගා තනා ගැනීමට තරම් ඔහුට විවේකයක් නැති වග ඇය දන්නීය. නමුත් ඇය තවමත්
නොවෙනස්ව හදවතින්ම ඔහු වෙනුවෙන්ම බලා සිටින්නේ සිය තුරුනු විය කෙමෙන් ගෙවී යන වගකුදු නොදන්නා
කාලය පිලිබඳව තැකීමක් නොකරන්නා තැනැත්තියක සේය. මේඝදූතය ඔහු ලියන්නට ඇත්තේ තමන්
වෙනුවෙන්මයැයි ඇය සියදහස්වර සිතමින් තුටු වන්නීය.

.

නැවතත් අහස දෙස බැලූ ඇය සුසුම් හෙලන්නට වූවාය. පොසොන් මහට ඇද හැලෙන දිව යන වැසි පොද ඇගේ
වේදනාබරිත සිත මදකට සිහිල් කරවමින් ඇගේ සළුපිලි යාන්තමින් තෙමාලන්නට විය. සිහිල් වැසි පොදේ මදක්
සනහාලුනු ඇයට අපූරු අදහසක් පහල
වූවාය.

.

 “එක තැනෙක නොරැඳී දිවෙන සිහින් වර්ෂාව? ඔතරම් තදියම කිමෙක්ද? මා හට මේ මේඝය දූතයෙකු වූවා නම්
මගේ පෙම්වතාට මා පිලිබඳව තතු රැගෙන යන්නට නුඹට නොහැකි මන්ද?

.

සෙමෙන් ඇද හැලෙන වැහි පොද ඇගේ ආයාචනයට සවන් දුන්නාසේ මදකට ඈ වටා රොක් වුනාහ. ඇය සිය
ආයාචනය පිලිගත් පොසොන් වර්ෂාව නැමති සිය දූතයාණන්  ආමන්ත්‍රණය කොට සිය සිතුවිලි මුදා හරිමින්
සිය පෙම්වතා පිලිබඳ තොරතුරු  තමන් වෙත ගෙන එන ලෙස ඒ සිහින් වර්ෂාවෙන් අයැදුයේ මෙසේය.

.

ඇදී යන මේ පොසොන් වැස්සේ කියන්නම් කරුනක්
සිටී ඔහු මට වඩා ඈතින් දුරක ගවුගණනක්
ඇදී යනවද හෙමින් සීරුවෙ වෙලා සෙත් කවියක්
අනේ වැස්සේ මටත් වෙනවද පුංචි හවුහරනක්?

.

පුංචි ඇස් දෙක හරි අහිංසක සා පොවෙකු වාගෙයි
හඳුන ගන්නට හැකිය හදවත වෙඬරු පිඩ වාගෙයි
පිරිමි සිත තුළ නැගුනු කඳුළැලි කොතරම් ද නොහැඟෙයි
ලොවට කවිකම් සිතුම් රස දෙන කුමරු ඔහු මාගෙයි

.

යොමා නෙත් යුග මවනවා ඇති වර්න නෙක රුසිරූ
අඳිනවා ඇති සිත් බඳින ලෙස නෙකයුරින් අකුරූ
හෙමින් ලං වී නොකර කරදර සිතම කර මියුරූ
අරන් එනවද ඔහුගෙ දහදිය සුවඳ ගත තැවරූ

.

නොදැනෙන්න මට කඳුළු ඉවසා සෙනෙහෙ මල් ඇතිරූ
සුවඳ තවරා සිත් පුරාවට වර්ණ ඇඳි සිතරූ
මගේ සුසුමන් පා කරන්නට සිනාකැන් වැපිරූ
හඳුන ගනු මැන සොඳුරු මිනිසා ඔහුයි මට මිතුරූ

.

නොදැනෙනා ලෙස ලං වෙන්න වෙයි කැලඹේවි සිත
සිනහවෙන් මුව පිරී ඇත් නම් මැල වේවි වත
සබඳ සකි සඳ නුඹේ සිසිලස දුක් ගෙනෙනු ඇත
අනේ විගසින් සුවඳ අර ගෙන එනවදෝ මවෙත???
.
.
.
ප-ලි
හුදෙක් මාගේ පරිකල්පනයක්ම පමනි

Wednesday, May 10, 2017

වෙසක් මහිම

සිත් පුරා සිහිලැති
සත් පියුම් පිබිදෙතී
සත් වගට සෙත් දෙති
සත් සියක් නමදිති

සිලි සිලිය දස අතේ
වනමලිය සුව දෙතේ
සඳ එලිය බැබලෙතේ 
සැරසිලිය සැම අතේ

ගසක් ගානේ මලුයි
රැසක් ගානේ පිනයි
ඇසක් ගානේ සුබයි
වෙසක් මාසේ ලබයි

නරන් බුදු ගුන අසන
සුරන් නුබ කුස වඩන‍
ඇරන් නෙත් යුග සොඳින
දරන් බුදු ගුණ නිතින!!!